កំពង់ឆ្នាំង៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងដោយបារម្ភអំពីសុខភាពរបស់សម្ដេចចៅហ្វាវាំង គង់ សំអុល ក្នុងពេលដែលសម្ដេចឈានដល់វ័យជិត ៩០ឆ្នាំហើយ ប៉ុន្តែនៅខំប្រឹងបំពេញការងារជូនរដ្ឋាភិបាលបន្តទៀត។
ថ្លែងក្នុងពិធីជួបជាមួយនឹងកម្មករជិត ២ម៉ឺននាក់នៅខេត្តកំពង់ឆ្នាំង ព្រឹកថ្ងៃទី៨ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន បានជម្រាបទៅសម្ដេចចៅហ្វាវាំង គង់ សំអុល កុំបាច់តាមអមសម្ដេចតេជោដោយសម្ដេចមើលឃើញពីសុខភាពរបស់សម្ដេចចៅហ្វៀវវាំង គង់ សំអុល កាន់តែជរា។
សម្ដេចថា៖ «នេះជាការប្រឹងប្រែងរបស់គាត់ក៏ប៉ុន្តែយើងត្រូវយកចិត្តទុកដាក់លើសុខភាពរបស់មនុស្សចាស់»។
សម្ដេចចៅហ្វាវាំងវរវៀងជ័យអធិបតីស្រីង្គារគង់ សំអុល មានវ័យ ៨៧ឆ្នាំ គឺជាអ្នកនយោបាយខ្មែរដែលបានធ្វើជារដ្ឋមន្ត្រីព្រះបរមរាជវាំងតាំងពីឆ្នាំ១៩៩៨៕
